სემინარი თემაზე: მოგების გადასახადის გაანგარიშება და დეკლარირება – ცვლილებები საგადასახადო კოდექსში (ესტონური მოდელი)
მ. წლის 6 დეკემბერს, ა(ა)იპ საქართველოს აუდიტორთა, ბუღალტერთა და ფინანსურ მენეჯერთა ფედერაციის“ სასწავლო ცენტრში (მისამართზე: თბილისის სასწავლო უნივერსიტეტი, ეგნატე ნინოშვილის 55, მეხუთე სართული,საკონფერენციო დარბაზი), ფედერაციის საგადასახადო კომიტეტის ინიციატივით, ჩატარდა სემინარი თემაზე: მოგების გადასახადის გაანგარიშება და დეკლარირება – ცვლილებები საგადასახადო კოდექსში (ესტონური მოდელი).
სემინარს ესწრებოდნენ: ფედერაციის ხელმძღვანელები, ფედერაციის წევრი აუდიტორები, ბუღალტრები, ფინანსური მენეჯერები, კომპანიების ხელმძღვანელები და წარმომადგენლები.
სემინარს უძღვებოდა თეიმურაზ ცერცვაძე – აბფმ ფედერაციის საგადასახადო კომიტეტის ხელმძღვანელი, საგადასახადო საქმის სპეციალისტი, საქართველოს საგადასახადო კოდექსის სასწავლო პროგრამების ავტორი.
განსჯისა და გათვალისწინების მიზნით, სემინარის მონაწილეებმა დასვეს შეკითხვები და გამოთქვეს მოსაზრებები მოგების გადასახადით დაბეგვრის შესაბამისად წარსადგენი ყოველთვიური დეკლარაციის ფორმასა და მისი შევსების წესის შესახებ საქართველოს ფინანსთა მინისტრის ბრძანების პროექტთან დაკავშირებით.
„ბუღალტრული აღრიცხვის, ანგარიშგების და აუდიტის შესახებ“ კანონის მიღების შემდეგ, ეს პირველი სემინარია, რომელიც ჩავატარეთ ფედერაციის წევრებისთვის. სემინარი ჩატარდა სრულიად უფასოდ. ასეთი ღონისძიებები შემდგომშიც გვექნება. იმედი გვაქვს, გამოთქმულ შენიშვნებისა და მოსაზრებების ნაწილს მაინც გაითვალისწინებენ. გადაწყვეტილი გვაქვს მოგების გადასახადით დაბეგვრის შესაბამისად წარსადგენი ყოველთვიური დეკლარაციის ფორმასა და მისი შევსების წესის შესახებ საქართველოს ფინანსთა მინისტრის ბრძანების პროექტის მიღების შემდეგ, კვლავ ამ თემაზე ჩავატარებთ სემინარს და უკვე მოქმედი ინსტრუქციის მიხედვით მივაწვდით მსმენელებს სიახლეებს“ – განაცხადა ფედერაციის გამგეობის თავმჯდომარემ ელფუჯა აფრიდონიძემ.
